Soomaaliya oo xiriirka u jartay dalka Guinea iyo Ujeedada Safarka Biixi ee Dalkaasi oo la ogaaday.

0

Dowladda Soomaaliya ayaa ku dhowaaqday goor dhow inay xiriirka u jartay dalka Jamhuuriyadda Guinea kadib marti-qaadkii uu dalkaas u fidiyey madaxweynaha Somaliland Muuse Biixi Cabdi.

Go’aankan ayaa waxaa ku dhowaaqay wasiirka arrimaha dibedda Soomaaliya Axmed ciise Cawad oo shir jaraa’id ku qabtay magaalada Muqdisho kadib kulankii golaha wasiirada.

Cawad ayaa Guinea ku eedeeyey inay ku xadgudubtay qarannimada Soomaaliya kadib markii sida madaxweyne dal oo kale ay usoo dhoweysay madaxweynaha Somaliland Muuse Biixi Cabdi oo booqanaya magaalada caasimadda ah ee Conakry.

Cawad ayaa sidoo kale dalalka kale uga digay inay ku xadgudbnaan qarannimada iyo midnimada Soomaaliya.

Wasiirka arrimaha dibedda ayaa sheegay in hadda kadib Soomaaliya aysan u dulqaadan doonin dalalka ku xadgudba qarannimada Soomaaliya ee mas’uuliyiinta gobollo ka tirsan Soomaaliya ula dhaqma sida hogaamiyeyaal dalal oo kale.

Wasiirka arrimaha dibeda Somaliland iyo Wasiirka Maaliyada ayaa si wada-jir ah u sheegay in ujeedada socdaalka Madaxweyne Biixi uu yahay sidii ay Somaliland u xoojin lahayd xiriirka dalalka galbeedka Afrika iyo weliba sidii ay dalkaas uga baran laheyd cashar ku saabsan qaabka uu u casriyeeyay dhaqaalihiisa.

Wasiirka arrimaha dibadda Somaliland, Yaasiin Faratoon ayaa sidoo kale waxa uu sheegay in labada wadan ay ka wada-hadli doonan arrimaha danaha guud inta ay joogan dalka Guinea.

Wasiir maaliyadda Somaliland, Sacad Cali Shire ayaa isaguna waxa u sheegay in socdaalka Madaxweyne Biixi ee dalka Guinea uu yahay sidii ay Somaliland dalkaas uga soo baran lahayd qaabka ay Guinea u casriyaysay dhaqaalaha, gaar ahaan qaybta macdanta.

Socdaalkan Madaxweyne Biixi ayaa muujinaya sida ay Somaliland u kobcinayso xiriirka ay la leedahay dalalka Afrika, taasi oo ay muddooyinkii la soo dhaafay sare u qaadeysay xiriirkeeda arrimaha dibadda, iyada oo si toos ula fal-galeysay wadamo badan oo ku yaalla qaaradda Africa.

You might also like More from author

Leave A Reply

Your email address will not be published.