Madaxweyne Farmaajo oo dalka dib uga soo laabtay, kana warbixiyay safarkii dalalka deriska

0

Madaxweynaha Dowladda Federaalka ah ee Soomaaliya, Maxamed C/llaahi Farmaajo ayaa Maanta Dalka dib ugu soo laabtay, kaddib safar qaatay saddex cisho oo uu ku tagay dalalka deriska ee Cidiamada ka joogaaan Soomaaliya.

Madaxweyne Farmaajo oo Shir Jaraa’id ku qabtay Garoonka Diyaaradaha Aadan Cadde ayaa sheegay in Dalalka deriska uu kala hadlay sidii Ciidamada Xoogga Dalka ay gacan ugu siin lahaayeen dagaalka ka dhanka ah Al-Shabaab.

Sidoo kale Madaxweyne Farmaajo ayaa sheegay in dhamaan Madaxda dalalkii uu booqday ay isku afgarteen in meel looga soo wada jeesto Al-Shabaab, isla markaana loo midoobo dagaalka lagu qaadayo.

Madaxweynaha ayaa sheegay in qaraxii dhowaan ka dhacay isgoyska Zoobe oo ay ku dhinteen in ka badan 300 ruux ay muujineyso sida Al-Shabaab ula dagaalamayaan shacabka Soomaaliyeed.

Waxaa uu sheegay in aan Al-Shabaab loogu dulqaadan doonin gumaadka ay shacabka ku heyso, isla markaana ay dowladda ka go’an tahay in Al-Shabaab laga xoreeyo guud ahaan dalka.

Axadii la soo dhaafay ayay aheyd markii Madaxweyne Farmaajo booqasho qaadatay saddex cisho uu ku tagay dalalka Uganda, Itoobiya iyo Jabuuti, halkaasoo uu kula soo kulmay madaxda dalalkaas.

Dowladda Soomaaliya ayaa dhowaan ku dhawaaqday dagaal ay la galeyso Al-Shabaab, isla markaana waxaa heegan la geliyay Ciidamada Dowladda.

You might also like More from author

Leave A Reply

Your email address will not be published.